Gob. Padaca ken 8 pay, Magsaysay Awardees ‘08

Gov. Grace Padaca

Gov. Grace Padaca

Impakaammo dagiti kameng ti board of trustees ti Ramon Magsaysay Award Foundation (RMAF) itay agtapos ti Hulio a pito nga indibidual ken maysa nga organisasion manipud iti India, Indonesia, Japon, Filipinas, Thailand ken Sri Lanka ti nangabak iti Magsaysay Award, ti bersion ti Asia iti Nobel Prize.

Indauluan ni Gobernador ti Isabela Grace Padaca (para iti Government Service) dagiti mapadayawan.

Mabigbigbig ni Gob. Padaca a nangpabileg kadagiti botante iti probinsiana tapno maisubli ti naindemokrasiaan a karbenganda tapno mabutosan dagiti lider a pilida, ken tapno makitinnulong dagitoy kas kangrunaan a kabinnulig iti bukodda a panagdur-as.

Ti Center for Agriculture & Rural Development Mutually Reinforcing Institutions (CARD MRI) manipud met laeng iti Filipinas ti kakaisuna nga institusion a nangabak iti tay-ak ti Public Service gapu iti “naballigi a panangadaptarda iti microfinance iti Filipinas, mangipapaay iti serbisio a komprehensibo ken makatulong kadagiti kagudua ti milion a nakukurapay a babbai ken ti pamiliada.”

Ni Therdchai Jivacate ti Thailand ti indibididual nga awardee para iti Public Service, a napadayawan gapu iti “naimpasnekan a gannuatna iti Thailand tapno maipaay ti nalaka, praktikal ken komportable nga artipisial a saka uray ti kakurapayan a pukol.”

Da agassawa a Prakash Amte ken Mandakini Amte ti India ti napadayawan para iti Community Leadership iti “panangitag-ayda iti kabaelan dagiti Madia Gonds tapno makaadaptarda iti agdama nga India, babaen ti panagagas ken panagisuro ken dadduma pay a napnuan dungngo a pannakisinnaranay.”

Maysa a Muslim nga intelektual manipud iti Indonesia, niAhmad Syafii Maarif, ti napadayawan para iti Peace and International Understanding, “iti panangibagnosna kadagiti Muslim a mangabrasa iti panagparbeng ken pluralismo kas sadiri ti hustisia ken panagkaykaysa iti Indonesia ken iti lubong.”

Ni Akio Ishii iti Japon ti napadayawan iti benneg ti Journalism, Literature and Creative Communication Arts gapu iti “natakneng a panagserbina a kas addaan prinsipiona a publisher a namagbalin kadagiti naririkut nga isyu a kas iti diskriminasion ken karbengan kas tao a nawaya a pagsasaritaan.”

Ni Ananda Galapatti iti Sri Lanka, sikologo a nagadal iti Britain, ti napadayawan para iti Emergent Leadership. Nabigbig daytoy gapu iti “bukod a kinareggetna a mangipaay iti umisu ken epektibo a serbisio sikososial kadagiti biktima iti aligagaw ti gubat ken natural a didigra iti Sri Lanka.”

Kinapet ti polio idi ubing, nagtrabaho ni Padaca kas accountant iti maysa nga estasion ti radio, ti Bombo Radyo, iti Cauayan, Isabela a nagangayanna nagbalin a nalatak a komentarista iti radio a nangtratar iti kurapsion, ilegal a sugal, logging ken ti di dumurdur-as nga ekonomia ken nadadael nga aglawlaw ti probinsiana.

Naabak iti panagkandidatona a diputada kontra iti kandidato manipud iti pamilia dagiti politiko idi 2001, ngem nangabak a gobernadora kontra iti sabali pay a kameng ti nasao a pamilia idi 2004 ken 2007.

Naipasdek idi 1957, ti Ramon Magsagsay Award ti kangatuan a pammadayaw iti Asia. Rambakan daytoy ti lagip ken pagwadan a liderato ti maikatlo a Presidente ti Filipinas, ni Ramon Magsaysay, ken tinawen a maipapaay kadagiti indibidual ken organisasion iti Asia a mangikut iti isu met laeng nga ingas ti sapasap a panagserbi a nangibagnos iti biag ti Dios-ti-aluadna ken natan-ok a Filipino a lider.

Maitipon dagitoy walo a 2008 Magsaysay Awardees kadagiti 263 a dadduma pay nakaaawaten iti kangatuan a pammadayaw iti Asia. Umawat dagiti mapadayawan itoy a tawen iti sertipiko, medalion nga addaan iti ladawan daydi Presidente Magsaysay, ken premio a kuarta.

Pormal a mayawat kadakuada ti Magsaysay Award iti Presentation Ceremonies inton Agosto 31 iti Cultural Center of the Philippines iti Roxas Blvd., Pasay City.

 

Naipablaak iti Bannawag, Agosto 11, 2008 a bilang, pahina 34-35.

Advertisements
%d bloggers like this: