Diego ken Gabriela Silang, Tampok iti Radyo Balintataw

 

Agassawa iti pudno a biag, akmen da dati a Senador ken Secretary Heherson Alvarez ken NCCA Executive Director/PA on Culture Cecile Guidote Alvarez babaen ti timekda ti dangadang a nagpasaran da agassawa a Diego ken Gabriela Silang iti maysa a nalidem a paset tin pakasaritaantayo iti espesial a programa a drama iti radio a napauluan iti “Lagablab sa Ilokos (1731-1763) Diego at Gabriela Silang”. Maipatangatang daytoy iti Radyo Balintataw iti alas nuebe agingga iti alas nuebe media iti rabii iti DZRH AM Radio 666 kHz iti panangesponsor ti PCSO ken PAGCOR. Pannakipagkaykaysa daytoy kadagiti parambak iti bulan ti Agosto kas iti Buwan ng Wika, ti ipupusay ni Ninoy Aquino, ken ti Nailian nga Aldaw dagiti Bannuar.

 

Ti dangadang ken ikkis para iti wayawaya nga inlungalong ni Diego Silang tapno malabanan ti di maikanatad a panagbayad iti buis, panagobra nga awanan bayad, pannakailupitlupit ken inhustisia nga impaay dagiti Espaniol, intuloy ti asawana a ni Gabriela idi makettel ti biagna iti ima dagiti nagulib a pada a Filipino. Binitay met laeng dagiti Kastila ti henerala ngem kas kuna dagiti historiador, saan a natungday ti pammatina a saan nga agsardeng ti Filipinas iti panangtun-oyna iti wayawaya. Immun-una iti 165 a tawen ti “Lagablab sa Ilokos” ngem ti rebolusion a naisayangkat idi 1896.

 

“Umisu unay ti ‘Lagablab sa Ilokos’ a pammadayaw iti manayon a pannakidangadangtayo tapno agtalinaed a nawaya saan laeng kas maysa nga agwaywayas a pagilian no di ket siwawayawaya iti panunot ken rikna tapno masapulantayo ti kinataotayo a mangitag-ay kadatayo iti panagdur-as nga awan makaatiw,” kinuna ni Mrs. Alvarez, nga isu met laeng ti prodiuser ken host ti Radyo Balintataw. “Mainumo daytoy a daton iti panangrambaktayo iti Buwan ng Wika ta daytoy nga obra iti literatura, orihinal a naisurat iti Iluko sa naipatarus iti Filipino. Adu a balikas iti Iluko ti nausar iti drama a mangipakita iti respeto ken suporta kadagiti nadumaduma a lengguahe rehional iti pagiliantayo kas paset ti napudpudno a pannakasukog ti nailian a lengguahe. Apagisu met a sagut iti pananglagip iti kinamartir ni Ninoy ken iti Aldaw Dagiti Nailian a Bannuar ta ti napasamak kada Diego ken Gabriela, kas agpada a martir, naulit kadagiti natatan-ok a tattao iti naunday a panangirupirtayo iti napateg unay a wayawaya kontra iti panangituray dagiti ganggannaet.

 

Maibagay unay ti panagakem a Diego ken Gabriela da Sonny Alvarez a taga-Cagayan Valley ken ti kaingungotna a ni Cecile a Vigan, Ilocos Sur ti ramut ti kaputotanna iti ina. Ti pannakaipaganetget ti panagayat iti wayawaya, aglalo kadagiti puso ken panunot dagiti agtutubo ti napateg a panggep ti drama.

 

Sinurat ni Jose Asia Bragado ti “Lagablab sa Ilokos”. Mannurat iti Iluko, Palanca awardee, Gawad Pambansang Alagad ni Balagtas manipud ti UMPIL, Pedro Bucaneg Awardee— ti kangatuan a pammigbig ti GUMIL Filipinas kadagiti llokano a mannurat a naisangsangayan ti gapuananna. Iti agdama, presidente ni Bragado iti Child Jesus College iti Bagong Silang, Caloocan City. Ti bersion a para-radyo, inurnos ni Noli S. Dumlao a resident writer ti Radyo Balintataw ken maysa met a Palanca awardee.

 

Kabayatanna, maysa a TV Special maipanggep ken ni Ninoy ti ipabuya ti Sining Gising inton Agosto 17, 2008 a kas panglukat iti “Peace and Freedom Week.” 

 

 

(Note: Kadagiti adda iti ballasiw-taaw, mabalinyo a denggen iti http://www.dzrh-interactive.com/ wenno iti http://radiotime.com/station/s_49650/DZRH_666.aspx)

Advertisements
%d bloggers like this: