Mannurat iti Bannawag Ben Gapasin, pimmusay

Pimmusay idi Agosto 21 ni Benjamin C. Gapasin, beterano a mannurat iti BANNAWAG, gapu iti nagkomplikasion a sakit. Agtawen iti 74.

Tubo iti Payocpoc Sur, Bauang, La Union, nagpaay pay ni Gapasin a presidente ti La Union Dramatic Club ken ti GUMIL La Union manipud 1978 agingga iti 1982.

Nagkolehio iti University of Sto. Tomas, sa iti University of the East, ngem iti Saint Louis College, San Fernando (City itan) ti nangiturposanna iti kursona a Bachelor of Science in Commerce, major in Management.

Nagsursurat iti daniw, salaysay ken sarita iti BANNAWAG, maysa kadagiti saritana, ti “Virginia”, ti nangyalat iti 2nd Honorable Mention iti Golden Leaf Literary Awards (1980).

Nairaman daytoy iti libro a Balitok ti Amianan (Vol. 3) a nakatiponan dagiti nangabak a sarita ken salaysay nga inedit da Dr. Godofredo S. Reyes ken Prescillano N. Bermudez.
Inulila ni BCG ni Regina a kaingungotna ken da Jocelyn, Melvin, Melchor, Manuel, ken Myline nga annakda. (Milagros Renon, GUMIL La Union)

Advertisements
%d bloggers like this: