Adda manen Salip iti Saribitniw

Silulukaten ti maikadua a nasional a salip iti saribitniw (sarita, bitla, daniw) a pagtinnulongan nga isayangkat ti Sir Pelagio Alcantara Development (SPADE) Foundation ken ti National Commission for Culture and the Arts (NCCA) ita a tawen. Maang-angay ti salip iti saribitniw iti kada tallo a tawen.
Kinuna ni retirado a Propesor Crescencia R. Alcantara, pangulo ti SPADE, a maysa daytoy a tampok ti 2nd Ilokano Literary-Cultural Festival a maangayto iti La Union National High School Quadrangle iti siudad ti San Fernando inton Nob. 30-Dis.1, 2008.
Silulukat ti salip kadagiti amin nga Ilokano a mannurat nga adda iti pagilian. Siwawayawayada a mangpili iti topiko a kayatda, ngem nasken a maibugas kadagiti pakisalipda ti kinapintas ken kinabaknang ti lengguahe ken kultura ni Ilokano, impaganetgetna.
Dagiti dadduma pay nga annuroten:

  1. Nasken nga orihinal ti pakisalip; saan a naipadron kadagiti immun-unan a nasurat wenno nangabaken a piesa.
  2. Agatiddog ti piesa iti sangapulo a panid, di nasursurok wenno nakurkurang.
  3. Nasken a maikompiuter daytoy iti short bond paper, doble espasio ken namardyinan iti maysa a pulgada iti aglikmut.
  4. Tallo a kopia ti pakisalip ti ipatulod iti Saribitniw Secretariat, SPADE Foundation, Namnama Village, Siudad ti San Fernando iti di naladladaw ngem Nob. 15, 2008. Pakuyogan ti pakisalip iti maysa nga electronic file (CD copy).
  5. Awan ti mailanad a nagan (pudno man wenno parbo) iti pakisalip. Ketdi, pakuyogan ti pakisalip iti seliado a sobre a naglaon iti impormasion maipapan iti ababa a kabibiag ti autor, agraman address ken contact numberna.
  6. Mapilinto dagiti finalists inton Nobiembre 25 ket maawisdanto a makilaban iti kampeonato a maangay inton Nob.30 iti La Union National High School. Ditoyto nga ipangngegda dagiti napili a piesada a pakapilianto dagiti mangabak. Mayawat dagiti premio iti dayta met laeng nga aldaw.
  7. Dagiti premio: Umuna a Gunggona – P10,000 ken medalia; Maikadua – P7,000; Maikatlo – P5,000; ken tallo a Pangliwliwa a Gunggona a sag-P2,000.00.
  8. Amin dagiti maisalip a piesa, agbalindanto a koleksion ti SPADE para iti bibliotekana.
  9. Para kadagiti mayat a makisalip nga agdadamo nga agsurat iti saribitniw, addanto maangay a libre a seminar-workshop inton Okt. 30 iti DMMMSU-Open University System iti siudad ti San Fernando.
  10. Makiuman iti SPADE babaen ti email: spade-bulletin@yahoo.com para iti dadduma pay nga impormasion. (Saribitniw Contest Secretariat)
Advertisements
%d bloggers like this: