Bulan dagiti grupo etniko, rambakan ti NCCA

Iti pannakarambak ti Bulan dagiti Indigenous People itoy Oktubre, suportaran ti National Commission for Culture and the Arts (NCCA), iti panangidaulo da Chairman Dr. Vilma Labrador ken Executive Director Cecile Guidote Alvarez, ti pannakaangay ti Timpuyog: Indigenous People Month Celebration iti Luzon.

Maangay ti nasao a pasken iti Oktubre 7-12, 2008, iti Siudad ti Santiago, Isabela a pakaitampokan dagiti pabuya, workshop iti arte ken panagpartuat, lektiur iti panangutob iti kultura, panagsisinnukat iti kapanunotan ken panagpasiar, ken dadduma pay.

Itandudo ti festival dagiti etniko a grupo iti Luzon, ken pagtitiponenna dagiti 16 a grupo etniko a pakairamanan ti Kalinga, Ilokano, Ifugao, Tingguian, Pampangan, Bontoc, Ayta, Isnag, Bicol, Mangyan, Ibaloi/Kankanaey, Ibanag, Itawes, Gaddang/Isinay, Bugkalot ken Tagbanua.

Maipasdek ti purok dagiti grupo etniko iti Bgy. Balintocatoc iti nasao a siudad. Itoy a parke, maipakita dagiti nadumaduma a balay dagiti grupo etniko iti Luzon.

Nasirmata kas parambak ti kappia, panggep daytoy a festival a pagtitiponen dagiti grupo etniko tapno makipasetda iti panagbibinglay iti kultura a mangitandudo kadagiti kangrunaan a paset ti wagas ti panagbiagda, agpada a material ken saan a material a kultura ken kannawidan.

Itoy makalawas a parambak, iparang ti tunggal makipaset a grupo etniko dagiti kannawidan a balayda, dagiti paggapuan ti pagbiagda, ritual, dayyeng, samiweng, kanta ken sala, estoria, kannawidan nga arte ken partuat, ken etniko nga ay-ayam.

Bayat ti festival, mabigbig dagiti traditional artists ken cultural masters, ken mapagpapatangan ti karbengan dagiti grupo etniko ken dadduma pay a banag a mainaig iti pannakaktaginayon, pannakaitandudo ken pannakapadur-as ti kannawidan a kultura tapno maapresiar ken maawatan dagiti dadduma a komunidad ken dagiti estudiante manipud kadagiti nadumaduma a pagadalan, kolehio ken unibersidad.

Mayalubog ti festival iti Presidential Proclamation No. 486 a pinirmaan ni Presidente Gloria Macapagal Arroyo ken mayannurot iti Presidential Proclamation No. 1124 nga impaulog ni dati a Presidente Fidel V. Ramos ken iti deklarasion ti United Nation’s General Assembly a manipud iti 2005 agingga iti 2014, mabigbig daytoy a kas Second International Decade of the World’s Indigenous People.

Idi Nobiembre itay napan a tawen, sinuportaran ti NCCA ti Kalimudan: Panaghi-usa sa Mindanao (Mindanao Indigenous Peoples’ Gathering) a naangay iti Davao City. Naitampok met ditoy dagiti grupo etniko iti Mindanao.

Itoy a tawen, idauluan ti NCCA Committee on Northern Cultural Communities ti programa a Timpuyog babaen ti gobierno siudad ti Santiago babaen ti pannakitinnulong dagiti nadumaduma nga ahensia ti gobierno, institusion ken dadduma pay a grupo.

Dar-ayan met daytoy dagiti opisial ti pagilian, dagiti NGO, kameng ti prensa ken estudiante manipud kadagiti nadumaduma a pagadalan iti Luzon. (Noli S. Dumlao)

Advertisements
%d bloggers like this: