Ilokano Plus, inyusuat ti MCC

Inyusuat ti Maui Community College, paset met laeng ti Unibersidad of Hawaii System nga agserserbi kadagiti isla ti Lanai, Maui, ken Molokai idi Setiembre 20 ti kaunaan a kurso iti Iluko (Ilokano) iti dayta a kolehio, ti Ilokano Plus.

Sangapulo ket dua dagiti estudiante a nagrehistro iti nasao a kurso a nagpaut iti maysa nga aldaw.
Ti Ilokano Plus ti umuna kadagiti pamadasan a programa maipapan iti lengguahe, kultura, ken pagsasao nga Ilokano a binalabala ni Dr. Aurelio S. Agcaoili, coordinator ti Programa iti Pagsasao ken Literatura nga Ilokano iti UH Manoa.

Ni Agcaoili met laeng ti agdama a presidente ti Hawaii Association of Language Teaching, maysa a pang-estado a grupo dagiti mangisursuro kadagiti nadumaduma a lengguahe iti Hawaii.
Kadua ditoy ni Agcaoili ni Prof. Julius B. Soria, mangisursuro met laeng iti programa nga Ilokano iti Unibersidad ti Hawaii.

Maysa nga eskolar iti heritage language education ken curriculum and instruction, ni Soria ti maysa kadagiti mangidadaulo iti pannakaisuro ti Ilokano iti sekundaria iti Honolulu babaen ti programa a GEAR-UP iti Farrington High School iti isla ti Oahu.

Dagiti nagadal iti umuna a pasada ti Ilokano Plus ket mangibagi kadagiti nadumaduma a paset ti komunidad iti Maui a pakairaman dagiti adda iti propesion iti abogasia, klinikal a sikolohia, panagbiblioteka, kinakontador, panagsukimat, ministro iti pammati, industria ti turismo, obra kadagiti agtutubo, counseling iti panagasawa ken pamilia, ken panagadal graduado. Dua nga estudiante iti sekundaria ti nagrehistro iti nasao a kurso.

Dagiti timmabuno iti umuna unay a kurso: Froilan Agcolicol, Walter Baloaloa, Marilyn Barbosa, Virginia Cantorna, Emily Cantorna, Lance Collins, Kim Compoc, Cody Fagaragan, Catherine Long, Nancy Rose, Arnold Sanchez, ken Divina Yoshikawa.

Dua pay a kurso ti mapangpanggep para iti Maui kas pangsarurong iti Ilokano Plus: ti Advanced Ilokano Plus ken ti Panagsuratan ken Panagiwarnak iti Ilokano.

Addanto iti babaen ti MCC ti mapangpanggep nga Advanced Ilokano Plus idinto ta ti panagsuratan ken panagiwarnak ket addanto iti babaen ti Fil-Am Observer, maysa a pagiwarnak iti estado, ken dagiti tumultulong a grupo.

Nairusat ti pannakabukel ti Ilokano Plus iti MCC babaen ti Office of Continuing Education ti nasao a kolehio, ti Maui Filipino Working Group, ken ti Fil-Am Observer.

Advertisements
%d bloggers like this: