GMM Meeting ken Premio Reynaldo A. Duque Awarding: Okt. 26

Maangay ti general membership meeting ti GUMIL Metro Manila, ti gunglo dagiti mannurat nga Ilokano iti Kamanilaan ken kabangibangna a probinsia, iti Wheeler St., Phase II-B, Royale Tagaytay Estates, Alfonso, Cavite inton Oktubre 26, 2008 iti alas dies iti bigat babaen ti panangsangaili da agkaingungot a Rey ken Tessie Duque, kas impakaammo ni Ansel D. Cargo, presidente ti gunglo. Maisaruno kalpasanna ti seremonia ti pammadayaw kadagiti nangabak iti umuna a salip iti sarita ti Premio Reynaldo A. Duque.

Iti miting, maiparang dagiti napagpapatangan iti kaudian a board meeting dagiti opisial ti GMM, sa mayalnag ti maikadua a bilang ti Saluyot, ti publikasion ti gunglo, para itoy a tawen.

Malaksid met ti pannakayawat dagiti gunggona iti Premio RAD, maysa kadagiti kangrunaan a paset ti seremonia ti pammadayaw ti panangtratar ni Apo Juan S.P. Hidalgo, Jr. iti apit ti nasao a pasalip— daytoy ti umuna iti serye ti ababa a lektiur nga angayen ti GMM tunggal general membership meeting.

Para iti dadduma pay a detalye, umawagkayo laeng ken ni Ariel S. Tabag, sekretario ti gunglo, iti telepono bilang 400-0089 wenno ag-teks iti CP bilang 0918-7458792. (Ma. Rose A. Cabie)

Advertisements
%d bloggers like this: