Lengguahe a Filipino, pausar ti SC iti korte

Isagsaganan ti Supreme Court (SC) ti pannakausar ti lengguahe a Filipino (Tagalog) kadagiti korte, kas impakaammo ni Chief Justice Reynato S. Puno itay nabiit.

Kuna ni Puno a ti pannakausar ti nailian a pagsasao iti korte, yasidegna ti hustisia kadagiti nakukurapay a Filipino, a kaaduan kadagitoy ti di makaawat iti pagsasao nga Ingles a sigud a maus-usar iti pannakabista dagiti kaso.

Sumagmamano kadagiti korte iti Filipinas ti mangus-usaren iti “Taglish”, ti napagtipon a Filipino ken Ingles, kadagiti bista tapno ad-adda a maawatan dagiti tattao dagiti mapaspasamak iti uneg ti korte.

Iti Korte Suprema, rinugianen ni Justice Ruben T. Reyes ti panangsuratna kadagiti desision ken resolusionna iti dua a pagsasao, Filipino ken Ingles.

Tapno ad-adda a maiduronna ti pannakausar ti Filipino iti korte, nangitudingen ti Philippine Judicial Academy (PhilJA), ti sanga ti SC para iti edukasion, iti maysa a seminar-workshop iti Oktubre 21 iti Bulacan State University iti Malolos City tapno masanay dagiti hues, piskal, ken abogado iti pannakaaramat ti lengguahe a Filipino iti korte.

(Bannawag – Oktubre 27, 2008)

Advertisements
%d bloggers like this: