Dagiti Agur-uray iti Asi ti Baybay

ni Jose A. Bragado

SINIRSIRIG ni Lakay Polon ti paar-aramida a biray. No maikapet dagiti agsumbangir a tabla a pannakadidingna iti ngato, birayen. Matungpalen ti arapaapna a maaddaan iti biray ken daklis iti ipon.

Kinitana ti relona. Alas siete. Sakbay ti alas otso no agsangpet dagiti agtartrabaho iti biray.

Agpidpidut kadagiti agkaiwara a sangkap idi sumangpet ni Idiong, ti pannakamaestro dagiti allawagi. Taga-Rancho ni Idiong, ti purok iti asideg ti sabangan.

“Adda damagko idiay Rancho, tata,” kinuna ni Idiong bayat ti panangiruarna kadagiti alikamenna iti bay-on. “Adda kano ordinansa idiay Caoayan a mangiparit iti panagdaklis iti ipon.”

“Apay kano nga iparitda?” kasla aleng-aleng nga insungbat ni Lakay Polon ket intuloyna ti nagpidut kadagiti sankap a pagtungo ni baketna.

“Gapu ta nakirang kanon ti lames a makalapan. Tapno umadu, masapul kano a maiparit ti agkalap iti ipon. Ad-adu kano ti pakairanudan dagiti tattao no dumadakkel dagiti ipon.”

“Di met palileng ken bunog ti pagbalinan dagiti ipon?” dinamag ti lakay a nangipisok kadagiti naurnongna a sangkap iti pisang a kuribot.

“Samman, tata.:

“Wen, a, ngem di met makalap amin ti ipon. No agdawel ti baybay ket mairana nga adda ipon, saan met a madaklis dagitoy. Pudno nga adda agsarep iti karayan wenno agkaput, ngem mano met laengen ti maalada? Ket agingga ita, saan met nga immadu ti lames. Sangkaagal dagiti kapurokak nga awan ti makalapanda iti karayan.”

“Dayta ngarud, tata, ta dida ammo ti estoria ti ipon,” kinuna ni Idiong. “Nagdamagda koma.”

“Kitaem laengen, manipud idi adda puotko, addan daytoy ipon a dakdaklisentayo manipud Oktubre agingga iti Enero. No dadduma, adda pay iti Setiembre, ken iti salsalput iti Pebrero. Kaaduanna a tallo la nga aldaw nga agdaklistayo ta pagam-ammuan ket addadan idiay karayan. Ket pasurongda daytan a pasurong. No sadino ti pagtungpalanda, awan ti makaammo. Amangan no dumanonda idiay Abra.”

“Sadanto agsalog a bunog no dadakkelda,” insarunong ni Idiong nga agas-asa itan iti paet.

“Ala, no iparitda idiay Caoayan, saan a bale. Basta saanda nga iramraman ti ilitayo” kinuna ni Lakay Polon a nangbagkat iti kuribot a naglaon iti sangkap sana impaigid iti puon ti lugo.

“ti dakesna, tata, ket kayat dagiti bokal nga iraman dagiti ili a rumrummuaran ti ipon.”

“Mabalin kadi ti kasta? Ania ti kuma ti mayortayo?”

“Adda kad’ mabalin ti mayor no aggapu itingato ti linteg?” naggarakgak ni Idiong.

“Adda kadin idiay kapitolio dayta nga ordinansa.”

“Adda kano idiayen, tata, ta naaprobaranen idiay Caoayan. Tapno agbalin nga ordinansa, masapul a pasingkedan dagiti bokal ken ti gobernador. Isu a kayat kano met dagiti bokal nga ilawlawa ti sakupenna. Ket mairaman ti ilitayo.”

“Madi daytan, a.” kinuna ni Lakay Polon. “Apay nga iramramanda ti ilitayo no awan met ti kasta nga ordinansana? Ania la ti kunan ni mayor? Di pay kasla bambanti?”

“Ti dakesna, tata, ket saanda nga agkadutdotan. Sabali ti partido ni mayor ken saanda nga ikabkabilangan. Dayta ti gapuna nga awan ti tulong ti gobierno probinsial a dumanon iti ilitayo.”

“Uray pay. Masapul nga irupirna ti kalintegantayo. Agpetision. No awanen ti agdaklis iti ipon, ania pay ti pamastrekan ti ili?” kinuna ti lakay.

“Ket saandan, a, nga agsueldo, tata.” Nagkatawa ni Idiong. “Rabakenyo ti lima a pesos nga itiketda iti sangalata nga ipon a rummuar iti ili?”

“Ania ngay ti kuna dagiti daklisan dita Rancho?”

“Agririda met, a, tata. No saankamin nga agdaklis, pangalaanmi ngayen iti pagbiagmi? Saankami met nga agtaltalon. Manmano met ti kaadda ti madaklisan nga ikan.”

“Pay man ta kasaokto dagiti daklisan ditoy purokmi,” kinuna ni Lakay Polon. “No awan ti maaramidan ni mayor, mapankami idiay kapitolio tapno kasaritami ti gobernador.”

“Nasaysayaat, tata, no agtutulagkayo amin a daklisan ta sangsangkamaysakayo a mapan ken ni mayor, ken uray ni gobernador. Napigpigsa ti timekyo no adukayo.”

“Adda ngata limapulo a daklis ditoy ilitayo?” dinamag ti lakay.

“Adda, a, tata, malaksid laeng dagiti daklisan iti Oribi ken Puro. Adu pay dagiti aggapgapu idiay Biao ken San Pedro idiay Narvacan ken Santa Maria.”

Rinugianen da Idiong ti nagtrabaho iti biray. Addan dagiti pito a karpintero.

Immuli ni Lakay Polon. Namles. Kinitana pay ti langana iti agkuskusapo a sarming ti aparador. Saanna a patien a limapulo ket limanan. Ub-ubing ti langana ngem iti tawenna. Adda ketdin saggaysa nga ubanna. Ngem awan pay ti madlawna a kuretret ti rupana. Dina ammo no busnag wenno lusiaw ti pudawna. Saan ngamin a main-initan idi agtrabaho idiay Manila.

Nagpalaud ti lakay. Inunana a kinasao ni Sidro a kabisilia ti maysa a daklis. Imbagana ti naammuanna ken ni Idiong. Nadamag kano metten ni Sidro dayta.

“No ngata mapantayo ken ni mayor, barok, ta agpatulongtayo?” kinunana.

Nayat ni Sidro. Napanda kinasarita da Lakay Ullong ken Tata Mundo. Tallo ti daklis iti purokda ket maikapatton no malpas ti araramidenna.

Nagtutulagda nga agudongda iti dayta a bigat. Nadutokan ni Lakay Polon a pannakangiwatda ta ammoda nga adda adalna. Inannugot met ti lakay. Masapul nga ipakitada nga adda sangida. Apay ketdin nga iparitda ti panagdaklisda? Kakaisuna a maminsan laeng a rummuar ti ipon iti makabulan ket tallo agingga iti uppat met nga aldaw nga agkalapda. Gagangay met nga uppat wenno lima a bulan iti makatawen nga adda ipon. No pagtaudan daytoy, awan ti makaammo. Kuna dagiti nagkauna a lallakay a lubuag ti taaw ti ipon. Rummuar ti ipon iti maikapito agingga iti maikasangapulo ket tallo iti kidem. Mangrugi ti panagbilang iti kidem iti kabus.

Idi laeng a makita ni Lakay Polon ti mayor. Nammuanna nga anak gayam ti maysa a kinaadalanna idi iti haiskul iti ilida. Impakaamona ti gagarada.

“Naammuak met ayta a panggepda,” kinuna ti mayor. “Pinadaskon ti simmupiat ta ammoyo met no kasano ti panangisakitko kadakayo a mannaklis. Ngem didak dinengngeg. Ammoyo metten, nasakit ti papangresanda kadagiti saanda a kapartiduan.”

“Ania ngarud ti nasayaat nga aramidenmi, mayor?” dinamag ni Lakay Polon.

“Agpetisionkayo. Dakayo amin a mannaklis ditoy ilitayo.”

“Nasayaat ngarud no agtitipon amin dagiti daklisan ditoy munisipio, mayor, ta pagsasaritaantayo ti aramidentayo.”

“Bay-anyo ta suratak ngarud dagiti daklisan, tata, sakayto pakaammuan. Ta tulagentayo ti iwayattayo,” insungbat ti mayor.

Nadagsen dagiti saka ni Lakay Polon idi pumanawda iti opisina ni mayor. Kasanon no mapaayda iti panggepda? Kasla narpuog metten ti arapaapna. Sinapsapana ti nagretiro iti trabahona gapu laeng iti ayatna a maaddaan iti daklis. Kayatna met ti maawagan iti kabisilia.

Nangrugi a tinarigagayanna ti maaddaan iti pagkalap idi agad-adal pay laeng iti sekundaria iti ilida. Nakidakdaklis laeng idi. Kanayon nga ungtan ti ulitegna a kabisilia. Kakaasi pay a baonbaonenda. Gapu ngata ta ulilan iti ama ket ammoda nga awan ti mangisakit kenkuana. Sensilia pay idi ti pangibilbilanganda kenkuana idinto ta aggaud, agsabo ken agguyod met. Tumapog pay iti danum iti rabii uray kasano ti kalamiisna. Trabaho ti bugador ti trabahona. Ngem gapu ta barito, ipilit dagiti lallakay a maipada kadagiti babbai ti bagina no tiempo ti bingay ti dinaklisanda.

Manipud idin, naimulan ti suronna kadagiti panglakayenda. Nasursurona met ti nagarapaap. No maaddaanto iti bukodna a daklis, ipakitananto met ti bilegna.

Isu nga idi agturpos iti sekundaria, napanen iti layasan. Ammona a dinanto a magun-od ti arapaapna no agtalinaed iti purokda. Purawton ti wak no makaurnong iti igatangna iti daklis no makidakdaklis laeng.

Saan a nagpilpili iti trabaho idi addan idiay Manila. Dandani napadasanna amin a kita ti nadagsen a trabaho. Nagkantero ken nagkarpintero iti konstruksion. Agingga iti nakastrek a mensahero iti nagtrabahuanna a konstruksion. Inanusanna metten ti nagadal iti rabii. Ket inleppasna ti komersio iti innem a tawen. Nakastrek met iti nasaysayaat a trabaho ken dakdakkel a sueldo.

Nagikkat iti trabahona kalpasan ti duapulo ket lima a tawen. Dakkel bassit ti naalana a retirement pay nupay awan pay ti innem a pulona. Kayatna ngamin ti agsubli iti purokda ta iwayatna ti arapaapna. Maysa, patienna nga at-atiddog ti biagna no agnaed iti igid ti baybay. Kasla aglalami iti siudad. Pulos a di agling-et. Agmalmalem nga adda iti nalamiis nga opisina. Sa la makapagwatwat no adda iti balayda iti Domingo.

Nagawidda nga agassawa. Dakkel met ti naala ni baketna iti panagretirona a mannursuro. Nagbati dagiti tallo nga annakda iti siudad. Agtartrabaho ti inaunaan idinto nga agbasbasa iti kolehio dagiti dua nga inaudi.

Idi sumangpet iti purokda, kinasaritana a dagus dagiti kakabagianna nga awan daklisna. Mayatda iti panggepna. Adu pay ti nangisingasing a gumatang laengen iti Segunda mano a daklis ken biray. Imbagada nga adda tagilako idiay Rancho. Tila mangidaklis. Napan kano ngamin idiay Hawaii ti akinkukua. Imbati la daytoy iti kabsatna. Bareng kano pay no matawaranda iti trentay singko mil ti biray ken daklis. Ngem kayatna ti baro a biray ken daklis. Amangan no adda tawidenna a buisit iti daan.

Idi napan a lawas, napanda idiay Vigan tapno agsapul iti tabla nga aramidenda a biray. Inkuyogna ti maysa a karpintero a makaammo a kumita iti nalagda a kayo ken naamnut iti danum nangruna iti apgad. Ngem awan ti nasapulanda kadagiti tableria. Napanda idiay Cabugao. Adda maysa a para kasko. Agatiddog daytoy iti tallopulo a kadapan ken agakaba iti tallopulo a pulgada ken dua pulgada ti kapuskolna. Adda met sangaparis a tabla a sangapulo ket innem a kadapan ti kaatiddogna a duma iti kasko. Agakaba daytoy iti maysa a kadapan. Adda pay dua nga agatiddog iti tallopulo ket dua a kadapan ken agakaba iti duapulo ket dua a pulgada. Ken ti akinngato a diding nga agatiddog iti tallopulo ket innem a kadapan ken agakaba iti sangapulo ket walo a pulgada.

Manmano ti kastoy a rukod ti tabla ket nupay nangina, kapilitan a ginatangda. Awan ngamin ti masapulanda kadagiti dadduma a tableria.

Idi kanikatlo nga aldaw nga inrugida a sinangal ti biray ta kinitada pay iti lunario ti napintas a bilang. Kuatro. Nabileg kano nga aldaw. Nagpartida iti aso ken kalding. Adu ti immay nakipatagnawa iti umuna nga aldaw. Ammo ni Lakay Polon a saan a ti trabaho ti immayan dagiti kapurokanna no di ket ti pagpasidana. Ngem saan a bale. Kasapulanda ti adu a tao nga agbagkat kadagiti tabla ta nadagsen dagitoy.

Idi kalman, nagpa-Vigan manen a kinakuyogna ti maysa a kaanakanna a makaammo iti nasayaat a kita ti gatangenda nga abel a para iti daklis. Kayatna a bayat ti panagtrabahoda iti biray, adda met agdadait iti daklis. Bareng no maikamakamda iti panagdadaklis iti ipon iti umay a bulan.

Beinte singko mil ti naigatangda iti abel idi kalman. Agkurang kano pay ta agatiddog iti sangagasut ket duapulo a metro ti aramidenna a daklis. Agakaba ti sungaban iti sangapulo ket dua a metro. Gumatangto pay iti nylon a tali a pagguyod. Masapulda pay ti tali iti ban-ay ken iti gamaw. Ken buli. Iti pattapatta ni Salong a kinakuyogna, aganay a kuarenta mil ti busbosenna santo agbukel a daklis. Iti ababa a pannao, makabusbos iti nasurok a pitopulo ribu a pesos iti biray ken daklis.

Sabagay, no adda gasatna, makatawen laeng ket masabrotnan ti puonanna. Kas kuna dagiti kapurokanna, adda kano pay nakakuarta iti beinte singko mil iti maysa a panagiipon laeng. Nakasakawda kano iti pangen ket nakaalada iti lima a kostal. Agduapulo a lata ti gas ti laonen ti maysa a kostal. Idinto nga agpateg iti nasurok a dua gasut a pesos ti maysa a lata.

Nakigtot pay ni Lakay Polon iti naammuanna. Idi pumanaw iti purokda, agpateg laeng iti sangapulo a pesos ti sangalata. Pasaray pay tallo a pesos no adda laokna a reprep, wenno maala iti sardam ket sa laeng mailako iti agsapa.

Ngem mano met ti pateg ti sangasalup a bagas idi? Pesos. Ita, pito a pesos ti sangakilo iti napintas a bagas, saanen a salup. Mano met ti plete idi manipud Santa agingga idiay Manila? Lima a pesos. Ita, nasuroken a sangagasut a pesos iti ordinario. Nanginngina iti beinte singko pesos no air conditioned.

NALPAS ngatan dagiti allawagi a nangaldaw ta agil-iladen dagitoy iti tabla iti sirok ti logo a pagtartrabahuanda. Agur-uroken dagiti dadduma. Nalaka a makaturogda ta napariir ditoy. Kastana met idi agtartrabaho iti konstruksion. No malpasda a mangaldaw, yiladda met kadagiti pakni. Kasla ngamin pumigsada no mairidepda uray sangkakuddot laeng. Idi kitaenna ti relona, nalabesen nga alas dose.

Immuli iti balayda. Aginana santo mangaldaw. Iti panagtugawna iti ampir ti tawa, namulenglenganna manen ti narukopen a balayda. Tawidna daytoyen kadagiti dadakkelna. Naimbag ta immabuloy ti maysa a kaanakanna a nagyan ditoy. No saan, amangan no narpuogen. Wenno inanayen. Ala, inton maiwakasna ti daklisna, isarunonanto a tarimaanen ti balay.

Napalabas ti sumagmamano nga aldaw. Dandani malpasen ti biray. Bareng no malpas iti dayta a lawas. No malpas, awisennanto ni Apo Padi ta pabendisionanna. Bareng no nagasatto. Ilumbadanto pay inton piesta dita Rancho ken iti purokda. Tallo kano metten a tawen nga agpipiesta ti barioda ket adda latta lumba ti biray. Patienna a napardasto daytoy ta mayat ti undayasna. Maysa, baro pay ket nalag-an.

Narugianda metten ti nagdait iti abel. Agar-aramiden dagiti dadduma iti gamaw. Nanangdan ti lakay kadagiti kapurokanna a napan nagpukan iti kayo idiay bantay iti aramidenda a gamaw ken ikabilda a paggaudan ti biray. Aramidenda metten a pakawan ti gaud dagiti dadduma.

No malpas ti daklis, utongannanto met tapno nagasat. Agpartinto iti baboy ken manok. Ket nalagipna ti kinaagtutubona no kasta nga agutongda idi iti daklis. Makijn-innagaw idi iti sinukat. Imasenna ti innapuy a diket ken nalaokan iti getta ti niog. Makiin-innuna pay idi a sumrek iti bubo ta kasla isuda kampay ti ipon wenno lames a maala ti daklis. Ket tunggal agutongda idi, makaalada latta iti kinostal. Adda pay a biag daydi apongna a Pilar a manglulualo iti utong.

MAYSA nga aldaw, iwarwardas ni Lakay Polon ti aramiden dagiti agtartrabaho idi dumteng ti maysa nga empleado ti munisipio. Adda surat nga intedna kenkuana. Mapanda kano amin a daklisan idiay munisipio inton maikadua nga aldaw. Agpa-Viganda met laeng kalpasan ti mitingda.

Sinegseggaan ni Lakay Polon dayta nga aldaw. Idi madanon ti Mierkoles, sinapsapada ti napan idiay munisipio. Idi dumtengda, nakasaganan ti petision a pirmaanda.

Nabiit ti mitingda. Imbaga laeng ti mayor ti panggep ni Lakay Polon ken ti nagsaritaanda a petision. Ken imbagana a mapanda amin idiay Vigan, malaksid iti mayor, ta kasaritada ti gobernador. No kas pagarigan ta napirmaanen ti ordinansa, kiddawenda nga ibabawida. A saanda nga ipatungpal.

“Saankayo nga umay, mayor?” nakuna ni Lakay Polon.

“Saanen. Ad-adda laeng a kaguranak ni gobernador no makitanak. Amangan no dina la ngarud patgan ti kiddawtayo.”

“Ngem napigpigsatayo no dakayo,” insungbat ni Lakay Polon.

“Pudno dayta, tata. Ngem sabali ni gobernador. Sabali ti panagkitkitana kaniak. Kabusornak unay. Sikan ti dutokak a pannakangiwat ti grupo. Patiek a kabaelam nga ikalintegan ti kidkiddawentayo.”

Saanen a nagtagtagari ni Lakay Polon. Nadamdamagna idin ti politika iti probinsiada. Nalabit a kasta ti kadagsen ti panagbinnusor ti mayor ken ti gobernador ket mairamraman dagiti awan basbasolna nga umili.

Nagpakadada. Gapu ta nasurokda a duapulo, nagsisinada iti pagluganan. Nagtutulagda nga agkikitada iti sango ti kapitolio.

Nasurok a sangapulo dagiti immune a naglugan iti mini-bus nga agpa-Vigan. Immudi da Lakay Polon a kaduana dagiti kapurokanna. Idi makaluganda, ni Lakay Polon ti nagbayad iti pleteda a nasurok a sangapulo.

Nasurok a kagudua ti oras ti biahe. Ket inkarkararag ni Lakay Polon a saanda koma a mapaay iti panggepda iti gobernador.

Idi dumtengda iti Vigan, addan dagiti immune a kaduada nga aglinlinong iti sirok ti mabolo iti sango ti kapitolio. Naggigiddanda nga immuli iti agdan ti kapitolio. Impalagip manen ni Lakay Polon ti nagtutulaganda nga aramiden.

Napasennaay ti lakay idi maammuanda nga awan pay ti gobernador.

Dinamag ti sekretario probinsial ti gagarada. Imbaga ni Lakay Polon.

Nagwingiwing ti sekretario. “Naaprobaranen, tata,” kinunana.

Isu met a sumrek ti maysa nga agkabannuag. Imbaga ti sekretario a maysa a bokal daytoy.

“Ania ti gagarada?” dinamag daytoy.

Imbaga ti sekretario.

“Kasta?” nakuna ti bokal. “Maykayo ditoy, tata.”

Nagturongda iti opisina dagiti bokal. Awan ti tao a nadanonda. Nagtugaw ti bokal iti sango ti lamisaanna. Ginuyodna ti alud ti lamisaan ket inruarna ti maysa a folder.

“Maymaysaak a nangikalintegan kadakayo ngem awan ti naaramidak,” kinuna ti bokal. “Ammok ti problemayo ta nagtaudak met iti pamilia dagiti mangngalap. Maysa, ti panagdaklis iti ipon ti kangrunaan a pamastrekan ti iliyo. No saankayon nga agdaklis, kasanon ti panagbiagyo? Inlawlawagko dayta. Ngem amok a paset ti politika ti napasamak. Bassit ngamin ti nabutos ni gobernador iti iliyo. Kasta met dagiti padak a bokal. Panagkunak, agibalbalesda.”

“Apay a dakami nga umili ti pagibalesanda? Iti kasta nga araramidenda, lumawlawa laeng ti di panagkikinnaawatan ti gobierno ken dagiti umili. Ad-adda nga awanto manen ti mabutosda inton sumaruno nga eleksion. Imbes nga agimulada iti ayat, gura ti imulmulada kadagiti tao.”

“Talaga a kasta ti politika, tata,” kinuna ti bokal. “Kinapudnona, saandak nga ibilbilang iti provincial board ta agmaymaysaak a nailaok iti partidoda. Siak laeng ti nakaruar iti partidomi. Agkapartidokami iti mayoryo. Nupay kasta, kasaritayo ti gobernador bareng no maawatanna ti panggepyo.”

Impakita ni Lakay Polon ti petisionda. Nagtungtung-ed ti bokal idi mabasana.

“Husto ti inaramidyo, tata. Nagsayaat koman no nasapsapakayo. Idi koma pay saan a napirmaan.”

“Adda ni gobernadoren,” adda nagkuna iti ruar.

Nagturong da Lakay Polon iti opisina ti gobernador. Ngem imbaga ti sekretario nga adda bisitana ket nagurayda.

Napalabas ti kagudua ti maysa nga oras. Kasla masarsaraban ti barukong ni Lakay Polon no mangngegna ti paggaak dagiti adda iti uneg. Aglalo ket sangkakitana ti oras. Amangan no rummuar dagitoy iti alas dose.

“Asino ti sangaili ni Apo Gobernador, sir?” dinamag ni Lakay Polon.

“Maysa a mayor dita amianan.”

Saanen a nagtagari ti lakay. Kaburburik gayam ti gobernador ti kasarsaritana.

Napalabas pay ti kagudua ti maysa nga oras. Dandanin alas dose.

“Ammo kadi ti gobernador ti kaddami, sir?” saanen a makatutor ni Lakay Polon. Masemsemen.

“Urayenyo a pastrekenkayo!” naingar ti sekretario.

Nagkusipet ti lakay. Kasta kadi ti sungbat dagiti agkunkuna nga agpaay kadagiti umili? Immanges laengen iti nauneg bareng maalayayan ti umirteng manen a barukongna.

Idi agangay, adda rimmuar a lalaki.

“Ti gobernador?” insikil ni Lakay Polon iti kaabayna.

“Saan nga isu,” insungbat ti taga-Rancho. “Isu dayta rummuaren.”

Minatmatan ni Lakay Polon ti nakatisirt nga agkabannuag a nakisarita iti sekretario. Iti panagkitana, saan a mapagtalkan ti kinatao daytoy. Kasla aglanglanga a sarangusong ken managbabai. Ken nakuspag. Kasano a naggobernador daytoy? Apay a pinangabakda?

Immasideg ti lakay. “Naimbag nga aldawyo, governor,” indayawna. “Daklisankami idiay Santa. Agpakpakaasikami koma ta ibabawiyo ti panangiparityo iti panagdaklismi iti ipon.” Impakitana ti petisionda.

“Napirmaanen ti ordinansa, tata, ket saanen a maibabawi. Mabalud ken agmulta ti asino man nga agsalungasing iti dayta a linteg,” insugbat ti gobernador ket nagnan.

Kimmamakam da Lakay Polon.

“Nalabesen nga alas dose. Adda kamkamakamenmi ken Mayor Sanches,” itudo ti gobernador ti agtaktakder a lalaki.

“No iparityo ti panagdaklismi, apo, kasla imparityo metten nga agbiagkami,” kinuna ni Lakay Polon a mangtepteppel iti riknana.

“Ne, ti lakay’toyen ta…”
sinabat ni Lakay Polon dagiti kasla kumilaw a mata ti gobernador. No maituredda a patayen, patayenda latta.

Ngem nagbaw-ing ti gobernador ket nagturongen iti van ti agur-uray a mayor.

Idi kitaen ni Lakay Polon dagiti kakaduana, kasla ur-urayen dagitoy ti pangngeddengna. Napaanges iti nauneg. Nakitana iti isipna da Idiong nga agtartrabaho iti biray. Dandanin malpas. Kasta met dagiti agdadait iti daklis. No iparitda, narpuog metten ti arapaapna. Kasanon ti gastosna?

“Basta agdaklistayo latta, kakadua,” kinunana. “Panagkunak, saannatayo a malaon ti pagbaludanda. Basta agkaykaysatayo. No matiliw ti maysa, agpatiliwtayo amin.”

Idi umulogda iti agdan ti kapitolio, nagallungogan ti padakpadakda iti sangsangkamaysa a panagdisco dagiti sakada iti tukad a kayo.

(Posted with permission from the author)

Advertisements

%d bloggers like this: