Biography

Naipasngay sadiay Bungro, San Ildefonso, Ilocos Sur idi Julio 19, 1947. Inaunaan ken kakaisuna a lalaki iti uppat nga annak da Apo Macario Palcong (pimmusayen) ken ni sigud a Primitiva Palomares.

Adda pay laeng iti maikatlo a tukad iti sekundaria idi maipablaak ti umuna a daniwna a napauluan iti “Sangaraay nga Arapaap.” Adun dagiti sinuratna a daniw, a kaaduanna ti naipablaak iti Bannawag. Adda met sumagmamanon a sarita ken salaysayna a naipablaak iti Bannawag met laeng. Kaaduanna kadagiti salaysayna ti maipanggep iti ipapanna panagtrabaho kadagiti nadumaduma a pagilian ken ti maipanggep iti panagbiag ken kasasaad dagiti kailian nga OFW a nasarakanna kadagitoy a pagilian. Nangabak iti maikatlo a puesto ti saritana napauluan iti “Dagiti Arapaap ni Lakay Belong”, iti salip ti sarita nga inesposoran ti Technical Education and Skills Development Authority-Region I idi 2005.

Nagturpos a Cum Laude iti B.S. in Industrial Education idi 1968. Nalpasna pay ti Master of Arts in Education. Nangisuro iti eskuelas publikas ken nagtrabaho iti daydi sigud a Bureau of Vocational Education. Nagtrabaho pay nga international Expert/Consultant iti sektor ti “Technical-Vocational Education and Training “(TVET) “ken iti Timber Processing/Woodworking Industries, kadagiti proyekto ti International Labour Organization (ILO), Asian Development Bank (ADB), United Nations Development Programme (UNDP) ken iti United Nations Industrial Development Organization (UNIDO). Naidestino kadagiti pagilian iti East Asia, Middle East, Africa ken iti South Pacific. Nakapanen sadiay Australia, ken kadagiti pagilian iti akin-laud a Europa a kas iti Austria, Switzerland, Netherlands, Italy ken England.

Kaingungotna ni sigud a Victoria Castro a tubo iti Manila. Tallo ti bungada, ni Harold , (Electronics & Communication Engineer), ni Heidi (Economist iti Thomson Corporation) ken ni Homer nga adda pay laeng iti haiskul. Agnaedda iti pamiliana iti Lagro Subdivision, Quezon City.

Advertisements

%d bloggers like this: