Nesperos, Tabag, umuna iti sarita ken daniw iti Gawad KWF

November 3, 2008 - One Response

Indauluan da Daniel L. Nesperos ti San Nicolas, Ilocos Norte, ken Ariel S. Tabag ti Sta. Teresita, Cagayan ti Umuna a Gunggona iti salip iti sarita ken daniw, kas panagsaganadda, iti Gawad Komisyon sa Wikang Filipino 2008 (iti Iluko), ti tinawen a salip nga ang-angayen ti nasao a komision kas paset ti pannakarambak ti Buwan ng Wikang Pambansa.

Pinangyalat ni Nesperos, dati nga empleado ti Liwayway Publishing, Inc., iti kangrunaan a premio iti kategoria ti sarita ti saritana nga “Anib”.

Pinangabak met ni Tabag, Entertainment Editor ti BANNAWAG, iti Umuna a Gunggona iti kategoria ti daniw ti daniwna a “Panangarakup iti Ipus ti Layap”.

Iti salip iti sarita, inyalat da Reynaldo A. Duque, dati a managing editor ti Liwayway, ken Tanod, ken Aida C. Tiama iti UP Diliman ti maikadua ken maikatlo a gunggona babaen dagiti saritada nga “Anak, Pagtaengan, Panawen” ken “Ti Alad” kas panagsaganadda. Dagitoy met ti nangabak iti Pammadayaw a Gunggona (Karangalang Banggit): Aurelio S. Agcaoili, pangulo ti NAKEM Filipinas, “Incommunicado”; Efren A. Inocencio, mangisursuro iti Quiling Elementary School, Batac City, “Ti Apo Adda Koma Kadakayo;” ken Sherma E. Benosa, freelance writer ken dati nga editor ti Health & Lifestyle, “Galunggong”.

Iti met salip iti daniw, inyalat da Guillermo I. Concepcion, publisher ti Vigan Chronicle ken Reynaldo A. Duque ti maikadua ken maikatlo a gunggona babaen dagiti daniwda a “Daniw-Dallang a Naibugas Umel nga Ikkis Kaunggan” ken “Dissodi ni Apo-ni-Bolinayen” kas panagsaganadda. Nangabak iti Pammadayaw a Gunggona (Karangalang Banggit) da Daniel L. Nesperos, “Dangadang”; William Labtis, retirado nga intelligence officer ken agdama a part-time instructor iti Society Training Academy, Laoag City, “Dagiti Agbirbirri A Sugat Barukong Agdardara”; ken Fernando B. Sanchez, district supervisor iti San Nicolas, Pangasinan, “Lobotomia, Lobotomis”.

Dagiti premio (sarita ken daniw): Umuna a Gunggona: P15,000.00 ken sertipiko); Maikadua a Gunggona: P10,000.00 ken sertipiko; ken Maikatlo a Gunggona: P8,000.00 ken sertipiko; ken Tallo (3) a Konsolasion: P2,000.00 ken sertipiko iti tunggal maysa.

Nagpaay a kameng ti hunta dagiti hurado da Jose A.Bragado (pangulo), Arnold Molina Azurin (kameng) ken Linda L. Bulong (kameng).

Tinarawidwidan daytoy da Janet F. Rivera (direktor) ken Francisca S. Nicolas (katulongan a direktor) iti Panrehiyong Sentro ng Wikang Filipino (PSWF), Rehiyong I, Siudad ti Batac.

Ipakaammonto ti opisina ti Komisyon sa Wikang Filipino kadagiti maseknan no kaano ken sadino ti pakaangayan ti seremonia ti pammadayaw kadagiti nangabak a mannurat. (Jess Ferrer)

(Bannawag, Nobiembre 10, 2008)

Advertisements